ثورة شعب ام ثورة جيش وشرطة
ليست ثورة شعبية "ساندها" الجيش، و إنما ثورة شعبية "نظمها" الجيش.
لما تبقى عارف ان تهاني الجبالي خططت الإطار "القانوني"
و ساويرس دعم تمرد و حملة إعلانية فيها أغاني
و البرادعي لف على كام دولة عشان "يقنعهم بالانقلاب" و يدبر فلوس ما بعد الانقلاب
و 3 دول تعرض 8 مليارد دولار هدية ما بعد الانقلاب (نصهم للجيش بشكل مباشر)
و الشرطة تنزل و "تركب" على ضهرك و انت بتاخد عصير، وفي بالونات
و الجيش ينزل لك كام طيارة يصوروك و مخرج "يزور" في الفيديو اللي اتصور من طيارة عسكرية و تاخده قناة خاصة قبل القنوات المحلية...
في جو احتفالي ما طالش عن يومين، و كله بتنظيم "الجيش و الشرطة"
يبقى انت كنت بتحضر "الفالانتاين" بتاع الجيش، مش نازل ثورة.
ولما تبقى انت طالب تقيل مرسي، و ترجع و انت شايل مرسي، و معطل الدستور، و حليت مجلس منتخب
و رميت خارطة الطريق اللي اتفقنا عليها في الزبالة
و عطيت وظيفة "رئيس" لرئيس المحكمة اللي فسدت الحياة السياسية اساسا و عطلتها
و وزير الدفاع بتاعك يعيث فسادا في المناصب بيعين نفسه نائب
و يعين حكومة أغلب اللي فيها فاسدين و عليهم قضايا كسب غير مشروع و أمن دولة و هم.
و يعين لجنة على مزاجه تكتب الدستور بدل المنتخبين، و يقولك اخلصه في شهرين و انت بتصقف بعد ما كانش عاجبك انه خلص في 6 شهور و كمان من ناس منتخبين.
انت مركب إيه في كتافك؟؟
الثورة، هي الفعل اللي بتقف فيه لوحدك مش بدافع "الكره" لحد، و لا بدافع "التعاطف" مع حد.
الثورة هي الصلاة اللي الكل بيقف فيها صف واحد، و عارفين ان واحد منهم هو الشهيد الجي،
و فرحانين. الثورة هي الأرض لما تتهز من تحت رجل الناس... ومايبقوش عارفين ربنا ح ينصرهم ولا لأ؟
و يشكوا في أمر الله... يظنوا إن ربنا ح يخذلهم. الثورة هي الفعل اللي كله "وجل" و "خوف" و "رجاء" و غلبة لضعف النفس و طلبها "الحرية" ولو على حساب "الأمان" أو حتى الحياة نفسها.
الثورة طاقة بتتفجر في جسمك بتقول مش ح اعيش غير حر...
أو احسن اموت، مش ح استحمل ثانية فساد، ولا حد "يركبني"...
أنا عايز صوتي يكون مسموع، عايز أئذن في الناس...
عايز صوتي الحر يفضل عالي في كل ميدان... في كل روح... الثورة... الثورة حالة....
ما ينفعش تتزور، بكام ورقة ممضية، ولا بفيديو من طيارة.
في فرق بين الفالانتاين (الانقلاب) و الثورة
0تعليقات المدونة
